லாலு பிரசாத் யாதவ் மூத்த மகனுக்கு வயது 25.. இளையமகனுக்கு வயது 26?

[oviya]

ராஷ்டிரிய ஜனதா தளக் கட்சியின் தலைவர் லாலு பிரசாத் யாதவின் மூத்த மகன் தனக்கு 25 வயது என்றும், இளையமகன் தனக்கு 26 வயது எனவும் வேட்பு மனுவில் தாக்கல் செய்துள்ளனர்.
பீகார் தேர்தலில் ராஷ்டிரிய ஜனதா தளக் கட்சியின் தலைவர் லாலு பிரசாத் யாதவின் இரு மகன்களும் போட்டியிடுகின்றனர்.

வைஷாலி மாவட்டத்தில் உள்ள மாகாவு தொகுதியில் மூத்த மகன் தேஜ் பிரதாப் யாதவ் போட்டியிடுகிறார்.

இளைய மகன் தேஜஸ்வி யாதவ் ரகோபூர் தொகுதியில் தேர்தலில் நிற்கிறார்.

இருவரும் கடந்த சனிக்கிழமையன்று நல்ல நாள் பார்த்து வேட்பு மனுத்தாக்கல் செய்தனர்.

வேட்பு மனுவில் மூத்த மகன் தேஜ் பிரதாப் யாதவ் தனக்கு 25 வயது என்று தெரிவித்துள்ளார்.

ஆனால், இளைய மகன் தேஜஸ்வி யாதவ் தனது வேட்புமனுவில் 26 வயதென்று குறிப்பிட்டுள்ளார்.

லாலுவின் மூத்த மகன் தேஜ் பிரதாப், கடந்த 2010ம் ஆண்டு 10ம் வகுப்பு பாஸ் செய்திருப்பதாக குறிப்பிட்டிருக்கிறார்.

தேஜஸ்வி யாதவ், கடந்த 2006ம் ஆண்டு 9ம் வகுப்பு முடித்ததாக தனது வேட்பு மனுவில் தெரிவித்துள்ளார்.

பிகார் தேர்தல் துணை ஆணையர் லட்சுமணன் கூறுகையில், அளிக்கப்படும் வேட்பு மனுக்களை ஏற்பது மட்டுமே தேர்தல் அலுவலரின் பணியாகும்.

வேட்பு மனு பரிசீலனையின் போதுதான் அதில் குறிப்பிட்டுள்ள தகவல்கள் சரியானதா இல்லையா என்பது குறித்து பரிசோதிக்கப்படும் என்று தெரிவித்துள்ளார்.

இது குறித்து லாலு தரப்பிலோ, ராஷ்டிரிய ஜனதா தளக் கட்சித் தரப்பிலோ அதிகாரப்பூர்வமாக எந்த கருத்தும் தெரிவிக்கப்படவில்லை.