ஓடும் ரயிலில் இறங்கிய மருத்துவர்: உடல் துண்டாகி பலியான பரிதாபம்

[oviya]

கோயம்புத்தூர் ரயில் நிலையத்தில் மருத்துவர் ஒருவர் தூக்க கலக்கத்தில் ஓடும் ரயிலில் இருந்து இறங்கியதால் உடல் துண்டாகி பலியாகியுள்ள சம்பவம் சோகத்தை ஏற்படுத்தியுள்ளது.
கோவை கேகே புதூர் சின்ன சுப்பம்மாள் தெருவை சேர்ந்த அருண்குமார்(38) என்பவர் பீளமேட்டில் உள்ள தனியார் மருத்துவமனையில் மருத்துவராக வேலை பார்த்து வருகிறார்.

இவருக்கு இந்திராணி என்ற மனைவியும் ஒன்றரை வயதில் மகனும் உள்ளனர்.அருண்குமார் சென்னையில் நடந்த மருத்துவர்கள் கருத்தரங்கில் கலந்து கொண்டு விட்டு நேற்று இரவு நீலகிரி எக்ஸ்பிரஸ் ரயில் மூலம் கோவை புறப்பட்டார்.

இன்று அதிகாலை 4.50 மணிக்கு வடகோவை ரயில் நிலையத்திற்கு ரயில் வந்து 3 நிமிடங்கள் நின்ற பின் மீண்டும் புறப்பட்டது.

வட கோவையில் இறங்க வேண்டிய அருண்குமார் தூக்கத்தில் இருந்து விழித்து, ஓடும் ரயிலில் இருந்து பேக்குடன் இறங்க முயன்றார். அப்போது தடுமாறி, பிளாட்பாரத்துக்கும், ரயிலுக்கும் இடையில் விழுந்தார்.

இதில் ரயில் சக்கரத்தில் சிக்கியதில், அவரது கை,கால்கள் துண்டாகி சம்பவ இடத்திலேயே பரிதாபமாக இறந்தார்.

இது குறித்து ரயில்வே பொலிசார் விசாரணை நடத்தி வருகின்றனர்.