அவண்ட்கார்ட் மிதக்கும் ஆயுதக்களஞ்சியம்: அரசாங்கம் தனது கருத்தை தெளிவுபடுத்துமாறு கோரிக்கை

[oviya]

அவண்ட்கார்ட் நிறுவனத்தின் மிதக்கும் ஆயுதக்களஞ்சியம் கப்பல் தொடர்பாக அரசாங்கத்தின் கருத்தை தெளிவுபடுத்துமாறு சிவில் அமைப்புகள் கோரிக்கை விடுத்துள்ளன.
கொழும்பில் சிவில் சமூக அமைப்புகளின் ஒன்றியம் இன்று செய்தியாளர் சந்திப்பொன்றை நடத்தியது. அதன் போது கருத்து வெளியிட்ட அமைப்பின் ஏற்பாட்டாளர் சமன் ரத்னப்பிரிய, அவண்ட் கார்ட் ஆயுதக்கப்பல் தொடர்பில் அரசாங்கத்தின் நிலைப்பாட்டை தெளிவுபடுத்துமாறு வலியுறுத்தினார்.

தொடர்ந்தும் கருத்து வெளியிட்ட அவர், அவண்ட் கார்ட் மிதக்கும் ஆயுதக்களஞ்சியம் தொடர்பில் அரசாங்கம் இதுவரை தெளிவான முடிவு எதனையும் எடுக்க முடியாத நிலையில் உள்ளது. சட்டரீதியான அதனைக் கையாளுவது தொடர்பிலும் அரசாங்கத்திடம் தெளிவான பார்வை எதுவும் இல்லை.

நல்லாட்சி கோசத்தை முன்வைத்து அதிகாரத்தைக் கைப்பற்றிய அரசாங்கமும் அவண்ட் கார்ட் ஆயுதக் கப்பல் போன்ற சட்டவிரோத செயற்பாடுகளுக்குத் துணைபோகின்றதா என்பது குறித்து ஆராய்ந்து பார்க்க வேண்டியுள்ளது என்றும் சமன் ரத்னப்பிரிய தெரிவித்துள்ளார்.

இந்த ஊடகவியலாளர் சந்திப்பில் சந்திரகுப்த தேனுவர, சமன் ரத்னப்பிரிய உள்ளிட்ட முக்கியஸ்தர்கள் பலரும் கலந்து கொண்டனர்.